У першым нумары новага года чытачы пазнаёмяцца з пераможцай літаратурнага конкурсу часопіса «Маладосць» — на лепшы празаічны твор для моладзі. Увесь пазамінулы год мы збіралі заяўкі, чыталі дасланыя творы — і выбралі лепшы: са шчырымі аўтарскімі самапрызнаннямі, каларытнымі вобразамі, дакладнасцю і жыццёвасцю мастацкага адлюстравання, гарманічнасцю біпалярнай кампазіцыі, арыгінальнай назваю ды ўдалай моўнай характарыстыкай персанажаў. Знаёмцеся — Лера Гілеўская і яе «Адэкалонны тытунь». Віншуем!
Паэзія ў нумары прадстаўлена вершамі Івана Карэнды і Віктара Шніпа, сярод паэтаў-пачаткоўцаў — Анастасія Хмель, Анастасія Балахонава, Мацвей Лішын.
Несумненна, чытача зацікавіць інтэрв’ю са старшынёй Саюза пісьменнікаў Беларусі, пісьменнікам, вядомым айчынным краязнаўцам Алесем Карлюкевічам. Прымеркаваўшы размову да яго юбілею, мы пагаварылі пра дзяцінства, юнацтва, стасункі з сябрамі і родную Пухавіччыну.
З рубрыкі «Мастацтва» вы даведаецеся, чые працы рэстаўрыруе мастачка Яна Янішчыц — унучка Яўгеніі Янішчыц — і ці ведае яна на памяць вершы бабулі. А мастак Міша Дайлідаў падзеліцца сакрэтамі сваёй неўтаймоўнай энергіі і раскажа, чаму носіць «чужое паліто».