У выдавецтве «Мастацкая літаратура» у 2021 годзе томікам «Выбраныя творы» Максіма БАГДАНОВІЧА была распачата новая кніжная серыя «Народная бібліятэка». Тыраж выдання ў 2021 годзе склаў 1000 экзэмпляраў.
Вось як патлумачылі нараджэнне новага праекта самі выдаўцы: «... народная таму, што змест кніг складаюць творы, якія прапануюць уключыць самі чытачы. Свае меркаванні выказваюць настаўнікі, студэнты, пісьменнікі, навукоўцы, бібліятэкары і г.д. — праз асабістае апытанне і інтэрнэт-галасаванне. У выніку ў зборнік „Максім Багдановіч. Выбраныя творы ўвайшлі амаль усе паэтычныя творы, пераклады і мастацкая проза гэтага таленавітага паэта, празаіка, крытыка, публіцыста, перакладчыка і самага маладога класіка беларускай літаратуры...»
З таго часу «Выбраныя творы» класіка беларускай паэзіі яшчэ перавыдаваліся. Агульны наклад склаў 2000 экзэмпляраў. Калі меркаваць сённяшнімі ўяўленнямі, то і ў гэтым — добры прыклад чытацкага стаўлення да класікі. У прадмове да кнігі дырэктар выдавецтва «Мастацкая літаратура» адзначае наступнае: «...Вынікі апытання засведчылі, што сярод сваіх самых любімых твораў Багдановіча рэспандэнты часцей за ўсё называлі яго „Раманс“, які, пакладзены на музыку Сымонам Рак-Міхайлоўскім, стаў знакамітай песняй „Зорка Венера“, сучаснаму слухачу найперш вядомай у выкананні ансамбляў „Песняры“ і „Сябры“. На жаль, год напісання верша невядомы (упершыню ён быў надрукаваны ў зборніку „Вянок“), як дакладна невядома і тое, каму прысвечаны гэтыя шчымлівыя радкі. Многія даследчыкі творчасці Багдановіча лічаць, што адрасат — Ганна Рафаілаўна Кукуева, з якой паэт пазнаёміўся падчас вучобы ў Яраслаўскай мужчынскай гімназіі, дзе разам з ім вучыўся яе брат Мікалай. Ганне Кукуевай Багдановіч прысвяціў у „Вянку“ раздзел „Мадонны“, пазначыўшы яе імя крыптонімам „А.Р. К.“, а таксама іншыя творы — лішняе сведчанне таго, што пачуцці паэта да яе былі вельмі шчырыя і глыбокія. Вось толькі каханне маладога паэта не стала ўзаемным: Ганна неўзабаве паступіла ў Пецярбургскую кансерваторыю. А ў 1914 годзе выйшла замуж за Максімавага аднакласніка па гімназіі — Івана Лілеева».
У «Народнай бібліятэцы» паспелі пабачыць свет кнігі Васіля Быкава, Янкі Купалы, Якуба Коласа, Міхася Стральцова, Уладзіміра Караткевіча, Янкі Маўра. Кожнае з выданняў разыходзіцца даволі хутка — зборнікі актыўна набываюць і пакупнікі ў кнігарнях і розныя бібліятэкі краіны. Чым не сведчанне высокакй чытацкай увагі да айчыннай класікі?!
Мікола БЕРЛЕЖ
Крыніца: https://zviazda.by
